Featured

First blog post

This is the post excerpt.

Advertisements

This is your very first post. Click the Edit link to modify or delete it, or start a new post. If you like, use this post to tell readers why you started this blog and what you plan to do with it.

post

KA THLAN LOH KRAWS

Laltanpuia Tpa Ngente.

Mihring hlui thihna kraws kawng zawh hi kawng awlsam a va ni lo țhin em. Hla siamtu chuan, *”Țap chungin kraws kawng ka zawh zel ang”* tiin, a vanin kawng bumboh zia hlain a puang chhuak a. Kan mihring mihrinna hi chuan he kawng zim leh chep tak hi thlan harsa a ti țhin a, mahse kan chhunga nung hian thlang lo thei lovah min siam si țhin a nih hi. Khawvel thlirna ațang chuan kraws kawng hi kawng awlsam leh nuam a ni mawlh lo, mittui nen zawh a ngaih chang a awm fo mai.

Lalpa Isua chuan, Pathian anga awma Pathian tluka awm chu thil thlakhlelh hleih theihah ruat lo va, thi khawp hiala thu zawma a lo awm ta ang khan, keini pawh chutiang tur chuan koh kan ni si a. *_”I naupan lai khan i taiah i inhreng a, i duhna apiangah i kal țhin a; nimahsela i upat hunah i kutte i phar ang a, mi dangin an hrensak ang chia, i duh lohna lamah an kai ang che,”_* (Johana 21:18-19) tih hi *’Kraws kawng’* chu a ni tlat si. *”Krista hmangaihna chuan min tir lui a ni”* tih ang hian kan mihring mihrinnain a duh lohna lamah hian a ni tirh luiha kan awm fo țhin ni.

Tute mah hian chhan leh vang awm lo chuan he kawng harsa leh bumboh hi kan kan thlang lo vang tirawh u. Tin, *’Imanuela, kan hnena Pathian awm’* hi kan chhungah hian nung in che țhin lo sela chuan theih pawh kan thei hek lo vang, a ni lawm ni. Mahse, Krista Isua mite chuan Krista zarah kan thlan loh kraws kawng hi kan zawh tlat fo si țhin a nih hi, a va mak em. Kan chakna leh theihna hmanga zawh tur ni ta ila tunge zawh thei ang le. *’Aman min thlan tawh zawkna avangin amah chauh chu thlang lo thei lovah min siam ta zawk a nih hi, Amen, Haleluiah.’*

Unaute u, kan van in kawng kan zawhnaah hian țahna te, tihduhdahna te, mualphona leh chânna te hi a va tam țhin em. Chatuan nun beiseitute ni lo phei ila chuan heng hi a lo thlawna tawrh chi em ni le.?

Kan Lalpa chuan, *”Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta,”* a ti a. Khawvel ngamtu hi kan Lalpa a ni a, *”Ani chuan sualna zawng zawng lakah mi chhan chhuak ang a, a van ramah chuan him takin mi thlen ang; amah chu chatuana ropuiin awm rawh se. Amen.”* (2 Timothea 4:18)

He beiseina nung min siam sak avang leh *’Awma’* chu keimahniah hian nunga a chen tlat avang hian diklo taka neksawrnaah pawh kan tuar hram hram a, kan mihring mihrinnain a thlan theih hauh loh *’Kraws’* kawng hi thlan tirin kan awm a. Krista avangin khawvel mite hlawknaah chântu kan ni a, hmusitna leh sawichhiatna avanga inkhinna awm theite tlanchhiat sanin kan diknaah pawh tlawm zawkah kan țang a.

He nun hi keimahni lam ațanga chhuak a ni lo va, Lalpa min pek a ni. Paula’n, *”Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni.”* (Galatia 2:20) a tih ang hian Krista kraws thihnaa thi ve takzet te chuan anmahni lamah chakna reng reng an nei tawh lo va, tih theih reng reng an nei tawh hek lo. Chu tak mai chu Pathianin a duh leh a nghah tak mai chu a nih avangin an nun chhungah Krista thlarau chu lutin a cheng a, amah ni tawh lovin Krista chu amahah a nung chhuak ta zawk țhin a.

Lal Isua chuan, *”Keimahah awm reng rawh u,”* a ti a. Tirhkoh chuan *”In rinna lawmman chu paih bo suh u, lawmman ropui tak a nei dawn si a.”* a ti bawk a. Țahna ruamah pawh kraws kawng zawh tlat tute hian kan tana lawmman buatsaih chu kan chân tawp lo vang a, van khawpuiah khian tih ropuiin kan awm zawk ang. A va han ropui dawn em.!

*Thu Puan 3:11-12 “Ka lo kal thuai dawn e; tuman i lallukhum chu an laksak loh nan che i thil neih sa kha vawng tlat rawh. A hnehtu apiang chu ka Pathian biak inah chuan banah ka siam ang a, chuta țang chuan an chhuak tawh lo vang; tin, anmahniah chuan ka Pathian hming nen, ka Pathian khua, Jerusalem Thar, ka Pathian hnena mi van ațanga lo chhuk tur hming nen, ka hming thar nen ka ziak ang.”*

*Amen, Lo kal ta che, Lalpa Isu.*

*Lalpa Isua khawngaihna chu mi thianghlimte hnenah awm rawh se. Amen.*

*♦🔹Tpa Ngente🔹♦*

VAN MIN THLEN ZO SIMNA

Laltanpuia Tpa Ngente.

Sima hi chi hnih a awm a. Pakhat zawk chu, mihring theihnain a tlin tawk simna, Pa lungawina tling zo lo, van min thlen zo lo simna a ni a. He simna hian thil țha tinreng a keng ve vek a, mihringte tan thil țha tak a ni a, sakhaw tin hian an inzirtir vek țhin.

A pahnihna chu, mihring theihnain a tlin phak hauh loh simna tluantling, Pa lungawina tling zo leh Van min thlen zo simna a ni.

Tun țuma han sawi ka tum hi, simna dik, Pa lungawina tling zo leh van min thlen zo simna a ni a. Hei hi Pathian thuin *’Simna’* a tih dik tak pawh a ni.

*’Van min thlen zo Simna’* chu, thil țhalo laka inthiar fihlim te, kan chin țhalo tih tawh loh te, min tihnawk nia kan hriat apiang hlih thlak theihna te hi a ni mai lo va.

Tin, zu in lai te, drugs tih lai te, hlep ruk lai te, inngaih chin lai te, suahsual rawng bawl laite kha *”Mihring hlui”* a ni mai lo va, khatiang zawng zawng tih duh tak loh hnu hi *”Mihring thar”* pawh a ni mai chuang lo va.

*”Simna’* tih te, *’Mihring thar’* tih te, *’Nun thar’* *”Piantharna”* tih te hi thil thuhmun vek an ni a, a awmzia chu *’Pathian zia, Isua zia, Pathian nungchang, Isua nun,’* tihna mai an ni. Chu *Pathian zia* chu mihring lam ațang hi chuan neih theih rual a ni lo va, chuvangin mihring hian Pathian pek a nih chauh loh chuan *’Simna tak tak’* hi a thleng phak lo hul hual a ni.

Thuthlung hlui hun chhung zawng khan Pathianin mihring hi sim turin a phut tawh țhin a. *’Dan’* kherkhiap leh hlauhawm tak hnuaiah an thil tihsual a zira thihna thlenga hremna *’Dan hlauhawm leh kherkhiap’* tak hmangin a enkawl a, chutiang chuan sim turin a phut tawh țhin a. Mahse chutiang khawpa dan hlauhawm hnuaiah pawh chuan mihring mihrinna hian *’SIM’* tak tak hi a tlin chuang lo va.

Hei hi a chhan chu, bawhchhiat ni ațang khan mihringah hian Pathianin a siam tel ve hauh loh *’dan danglam’* tuha a lo awm tawh vang a ni. Chu dan danglam chu *’tisa dan’* a ni a, tisa dan chu *’Setana zia’* tihna mai a ni. Chu tisa dan chuan englai mahin *’Pathian zia’* a pu thei lo va, Pathian duh dan a tlin thei lo va, Pathian nen pawh a inrem thei lo va.

Chuvangin Pathian chuan amah nena inrem thei tawh lo mihringa *’tisa dan’* chu tuaihnuma cheibawl thar leh vel hi a tum a ni lo va, tih hluma Ama nun, nun thar zawk chu mihringah hian dah a tum zawk a.

Tichuan, amah Pathian chu mihringah lo changin mihringa *’Tisa dan’* chu kross ah a thih pui te te a, a tho leh nun, nun thar chu kan *’mihring hlui’* *’tisa dan’* tih hlum nan leh nun thar kan neih theih nan ringtute chhungah hian min dah sak ta zawk a ni.

Chu Pathian thlarau kan chhunga awm chu Bible chuan *’Thlarau thianghlim’* tiin a sawi a, a țhenah *’Pathian Fapa thlarau’* tiin a sawi bawk a. Paula chuan, *’Krista chu nangmahniah siam puitlina a awm hma loh zawng nau veiin ka vei leh che u hi. A ni, tun lai hian in hnena awma ka aw tihdanglam ka chak theihzia mai chu; in chungthu-ah ka mangang si a.’* tiin kan chhunga Thlarau thianghlim awm hi siam puitlina a awm a pawimawh zia mangang leh țhahnem ngai takin a sawi hial a nih hi.

Ringtute hian hei hi kan hriat fiah a ngai hle mai. Tirhkoh Paulan *”Keimahnia thawk țhin thiltihtheihna”* a tih hi Pathian Fapa thlarau, Thlarau thianghlim hi a ni a. Thuthlung hlui hun chhung zawnga mihringin *’Sim’* a tlin thei ngai lo ang khan tunah pawh hian *’Sim’* hi kan la tlin thei chuang lo cheu va. Chuvangin Pathian chuan keimahnia awm *’Tisa dan’* *’Setana zia’* hi amah biak nan a pawm lova, a hnawlin a hlawl hmiah a, ama nun hmanga Amah kan biak theih nan a Thlarau thianghlim chu kan chhungah hian a dah ta zawk a, hei hi a ni *”Keimahnia thawk țhin thiltihtheihna Thlarau”* chu.

Ringtute hian hei hi theihnghilhin keimahni lam theihna hian kan sim theiin Pathian kan pawl ve thei rêng emaw tih a awl khawp mai, chutiang chuan mahni lam inpekna leh inhlanna tak tak nei hmasa turin kan inzirtirin, chumi chinah chuan kan inzirtirna hmawr kan bawk leh mai țhin.

Khawngaihna hnathawh dan kan hriat thiam loh vangin keimahni inpek chiamna leh beih vakna ațanga *”Simna Nun”* neih theih emaw kan ti țhin a, kan bei vak a, kan nghet thei chuang si lo va, mi beidawng kan tam em em a, tin, thlaraua rawng bawl lova mihring theihna hmachhuana rawng bawl kan tam phah em em bawk țhin. A hmasa zawk *”Khawngaihna Thlarau, Thiltihtheihna thlarau”* ringtu dik tak ten an chan țhin hi hrefiah hmasa chunga Amaha lawmna erawh chuan fel tumna leh țhat tumna te, Pathian tih lawm tumna zawng zawng te a um bo va, fel famkim Krista thlarau zawk chuan chhung lam atangin kan nun kaihruaiin *’Simna nun* takah chuan min hruai lut zawk țhin a, chu nun ațang chuan kan chakna ni lovin Pa rawng kan bawl țhin a ni.

He nun hi Tirhkoh Paula chuan, *”Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tunah tisaa ka nung hi rinnaa nung ka ni – Pathian Fapa, mi hmangaiha ka aia inpetu rinnaah chuan.”* tiin fiah takin a sawi a ni. (Galatia 2:20) Tirhloh Paula hian, *’Ka inkhengbet’* a ti lo va, *’Khenbehin ka awm ta’* a ti zawk a ni.

Chuvangin, khawngaihna chuan sim turin min phut hmasa tawh lova, eng lai maha sim hlen thei lo nun kawltute chu kan fellohna hmu tinrengah min zawng chhuakin kan hnenah *Fel famkim Pathian Fapa nun* min pe ta zawk a. Chu nun thar neitu, Pathian Fapaa piang dik tak, Krista chu amahah siam puitlina a awmna mihring chuan, ama chakna ni lovin, nitin sim tir zelna a chang zawk țhin. Misualte zawk lama sim tir tura a lo kal ang khan.

Keimahni’n kan sim a ni lo va, kan chhunga nung hian min sim tir țhin zawk a ni. Keimahni lam chuan kan thei lo va, ti theitu kan chhunga awm hian min sim tirin min siam thar zel țhin zawk a ni.

Amaherawh chu, helaiah hian hriatthiam lohna a awm ve thei a. *’Mihring ațanga chhuak reng reng hmangin Pathian hmaah kan insim thianghlim zo lo’* tih avang hian engmah tih tum lo leh kal ngaihna hre loin a awm phah theih a, fimkhur a ngai hle mai a, hre fiah tura taihmak chhuah a ngai hle a ni.

Chuvangin *”Simna nun”* tak tak nei tur chuan simna tak tak min neih tir theitu Pathian Fapa thlarau chu keimahniah a nuna, chu mai ni lovin siam puitlina a awm a ngai a. Chutianga Krista chu keimahniah siam puitlina a awm theihna tur chuan, *’duhna tak tak nen amah kan pawl fo țhin tur a ni.’*

Tichuan, amah kan pawl tam poh leh kan theihna zawng zawng sawm khawma kan beih chiam pawha mahni intithianghlim zo lo kan nih zia inhriatfiahna kan nei chiang tulh tulh ang a, kan hlawh chhuah phak loh *”Khawngaihna”* avanga a thlawna ngaihdamna chang mai kan nih zia te, kawng engkimah amah lo chuan theihna reng reng nei lo kan nih zia te hriatfiahnaah hruai luhin kan awm tulh tulh ang a, tichuan maha innghat tawp lo thei lo nunah hruai luhin kan awm tak tak ang.

Hei mai hi a la tawk lo va, ringtute hian Bible chhiar leh țawngțai te, fianriala amah pawl fo te, min tihnawk apiang hlih thlak ngam te, kan thlarau tana taihmak chhuah fo te hi englai pawha kan tih makmawh te an ni a. Tichuan, heng thilte thlahthlam lova taihmak chhuah fo țhin apiangte chu Ani’n a thlarauin a luah nghet tulh tulh a, chutih rualin an mihring hlui lam chu a chin ral sak tial tial bawk a, chumi kawng ațang chuan thlarau nun puitlinna, *’Simna dik leh simna tluantling’* chu ringtute hnenah pekin an awm țhin a ni.

Kan mihring hlui hi keimahni’n kan chin rala kan vuak hlum tur a ni lo va, Pathianin min chin ral theih nan amaha tluk luh leh amah pawl tam hi kan tih tur chu a ni mai.

Hebrai ziaktuin, *”Min tihnawk apiang leh sual keimahnia bet tlat chu i dah ve ang u. Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u.”* (Hebrai 12:1) a tih te hi hman sual awl tak a ni a. Mihringin *’Min tihnawk apiang’* kan hlih thlak hian kan mihring hlui hi chin ralin a awm ta tihna a la ni mai lo va, hemi chinah hian kan zirtirna kan țhuai bung mai tur pawh a ni lo, hetiang chin hi chu sakhaw dang betute pawhin an pathian tan an ti thei ve vek a ni. Pathian zawkin min chin ral tak taka, keimahniah Ama thlarau chu min siam puitlin sak theih nan, tlinna reng reng nei lo chungin atan kan nun kan inhawng ve tihna mai ni a. Tichuan, chung mite chu Pathian zawkin khawngaihnain a lo pawm a, a lo tiam tawh angin *’Thinlung thar’* a siam sak a, *’Simna nun’* tak tak chu a neih tir țhin zawk a ni.

Hei hi ringtu nun kawng tinrengah, mimal nunah leh rawnbawlnaah pawh, a țhanlenna tura a hnukpui a ni.

*_2 Petera 1:4 “Chung zarah chuan a thutiam hlu tak leh ropui nasa takte chu min pe a ni; chutichuan châkna avanga khawvela chhiatna lo awm hi tlan chhuahsan tawhin, chung thutiam hlu tak leh ropui nasa takte avang chuan PATHIAN NUNGCHANG IN TAWMPUI VE THEI ANG.”_*

*Lalpan a thu malsawm rawh se, Amen.*

*@Tpa Ngente…*

DAM CHHUNG NI CHHIAR DAN

*DAM CHHUNG NI CHHIAR DAN*
*(Thuhriltu ațangin zir ila.)*

Laltanpuia Tpa Ngente.

Pathian thilsiam tinreng, mihring te leh lei leh van leh a chhunga thil awm zawng zawngte hi kan chhoh thlir chuan hriatthiam sen rual lohin a inphan khat chuat mai a. Mihring nunkawng pawh vanneihna leh vanduaina te, hausakna leh retheihna te, hlimna leh lungngaihna tea khatin kan hmu a. Chumi chhungah chuan duhamnaa khat mihring hian țha hlir kan duh a, kan inchuh luai luai a, rawngbawltute thleng pawhin rawngbawlnaa dinhmun țha duhin kan intlansiak a, tumah kan bang lo. Mahse mihring zingah kawng țha ber hmu thiam tumah kan awm lo.

Min zirtirtu tura Pathian ruat Thuhriltu erawh chuan, Pathianin thil tam tak a paltlang tir hnuah Ama mit leh thinlung a put tir a, chuta țang chuan a hmu tlang ta uar mai a. Mihringin fanghmir bu kan thlir a, fanghmir tana khawvel zau tak, an hriat zawh sen rual loh kha keini’n kan hma zawnah kan hmu zo vek ang mai hian, Thuhriltu chuan hringnun hi a chhuk thlir a, fanghmir bu zawl ang lek kan ni tih a hmu a. Kan damchhung ni pawh nikhat ang, vawiina piang, a tuka boral leh, a awmna chuan a hriat reng tawh ngai lohte kan ni tih a hmu a.

Hringnunah hian ngaihhlut tlak a awm loh zia a hmu chhuak a, kan ngaihhlut thil tinrengte hi engmah lo mai a nih zia a hmu chhuak a. Hringnun kawng zawh tur țha ber pawh a hmu chhuak a, chu chu hriatthiamna nei tura Pathian hnena awm a ni tih min kawhhmuh a ni.

*_Thuhriltu chuan, “Engmah lo mai mai, Thil zawng zawng hi engmah lo mai a lo ni,” a ti a._*

*_Mihringin a hnathawh, ni hnuaia a thawhah chuan hlawkna eng nge a hmuh? Chhuan khat an liam a, chhuan dang an lo chhuak a, Lei hi erawh chu a awm reng mai._*

*_Mi, finna leh hriatna leh thiamnate nena thawkrimtu chuan, thawk ve hauh lo mi hnenah a hnutchhiah ang._*

Leiah hian kan cham rei dawn lo va, hausain rethei ila kum 70/80 bak kan daih dawn chuang lo. Tu leh fate hmakhua ngaia țhahnem ngaih viau pawh hi țhat khat chuan a țha e, mahse kan hmangaihte hian an țhat pui loh zawkna hi sawi tur a tam ve tho mai. Chuvangin chintawk chauh neih thiam leh hringnun chhiar thiam a va țul em. *’Lalpaah’* tih hi kan nun laimu ni reng thei se, engmah hnutchhiah thei lotu fa pawh Pathianin a enkawl a, tam tak hnutchhiah tur neitu fa an nihlawh ber chuang lo tih hriatthiamna hi hringnun hian a mamawh a ni.

*_Ka rilru hi finna hre tûr leh âtna leh fin lohna hre tûr pawhin ka hmang a, hei pawh hi thil lothlawn mai a lo ni. Finna a nasat poh leh buaina a tam a, hriatna a pun poh leh manganna a pung._*

Mihring hian midangte tana țha ber tur chu sawi loh, mahni tan ngeia țha ber tur pawh kan hre tawk zo lo. Chutiang mihring chu kan nih avangin kan buai reng fo țhin. Kan țhatna tur hre bertu leh min hmangaih bertu Pathiana awm tlat mai hi a va țha em, chu chu kan khualzinna rama kan cham chhung reilote atan hian kawng țha ber a ni a, a hnenah chuan buaina a kiang țhin a ni.

*_”Khawi nge, nawmsipbawl ka’n ching teh ang, a nuam teh reng emaw” ka ti a, mahse hei pawh hi eng a lo ni lo. Nuih hi a âtthlâkzia ka chhar chhuak a, hlimhlawp lah eng ruai a ni lo._*

Engvangin nge lehkha kan zir? Mahni inhmangaih vangin. Engvangin nge hna kan thawh? Mahni inhmangaih vangin. Engvangin nge in leh lo țha din kan duh? Mahni inhmangaih vang bawk. Engvangin nge zu ruih kan châk? Hei pawh mahni inhmangaih vang bawk a ni. Heng thil zawngtu mihringte hian nei ila nei suh ila reiloteah khawvel hi kan chhuahsan vek dawn a, kan awmna chuan min hre reng lo vang. Chuvangin engkimah Lalpa hmasa sela, thianghlim leh hahdam taka hriatthiamna neia Van thlir chungin leiah hian i cheng ang u.

Lalpa lova nuihna chuan rei a daih ngai lo va, khawel par mawina hi chuan hlîng angin min chhun zui țhin. Krista hmangaihna erawh chu a thlum a, chatuan daih a ni.

*_Hna nasa tak ka thawk a; inte ka insak a, grêp huante ka insiam a, huante leh ngaw nuamte ka insiam a. Chhiahhlawhpate leh chhiahhlawhnute ka lei a, ka ina piang chhiahhlawhte ka nei bawk a; bawng rualte leh berâm rualte pawh ka nei țeuh va. Chutichuan, ka lo ropui a, ka hmaa awmte zawng zawng chu ka khum a._*

*_Tin, ka mit itzawng apiang chu ka hlah lo va, ka thinlung pawh eng lawmnaah mah ka sum lo. Tichuan, ka kut chhuak zawng zawngte leh ka thawhrimnaa ka thiltih zawng zawngte ka han en hian, ngai teh, thil zawng zawng hi engmah lo leh thil lothlawn mai a lo ni, ni hnuaiah hian hlawkna rêng rêng alo awm lo ve!_*

Mihring hian khawvel hausakna hi kan hlimpui dawn tlata hriatna nghet tak kan nei tlat a, mahse retheite hrehawmna aiin hausate rûmna a ril zawk tih kan ngaihtuah lo. Khawvel hausakna zawng zawng hûm khawm vektu Lal Solomona meuh pawh Lalpa lo chuan a hlim chuang hauh lo a nih kha.

*_Tangka sum ngainatu chuan tangka sumah duhtawk a hmu lo vang a, hausak ngainatu chuan duhtawk a hlep hek lo vang: hei pawh hi engmah lo mai a lo ni. Sum leh pai a lo pun chuan eitute pawh an pung a, a neitu tan a mita hmuh mai loh chu eng nge a sawtna? Thawkrimtu chu a ei tlêm êmaw, a ei tam emaw, a mut a tui thin a, mi hausa chuan a ngahna chu a muthilh loh phah zawk ang._*

Khawvel hausaknaah hlimna awm tlata hretu chuan a beisei hlimna chu a dam chhungin a hmu ngai lo vang a, rethei leh thawkrim reng rengin a damchhung ni a chhiar liam zawk ang. Lalpaa lungawina neia chan tawk hlimpuitute hi mi hausa ber an ni.

Duhamna nena bei vaktu pawh mi rethei aiin a pumpui a lian chuang lo va, rethei chaw bar aia tam a bar thei chuang lo. A duhamna hlawh chhuah chu midangin an chen a, a mita thlir mai loh chu tih theih a nei lo. Pathianin a pek hlimpuia lungawi taka a chantawk hna thawk țhintu chuan tui taka barin tui takin mutmu a tuah țhin a, duhamna nena fawm khawm țeuhtu chuan hahpui țeuhin a mut theih loh phah a, a hum kumhlun thei chuang lo.

*_Pathian lovin tunge ei leh bar leh intinuam thei awm ang? Amah tilungnitu hnênah chuan finna te, hriatna te, lawmnate a pe si a: mi sualte erawh chu, Amah tilungnitute hnêna pêk chhawn tûr, lak khâwm leh chhek khâwm hna a pe zawk a ni._*

Engkim hnar chu Pathian a ni. Tui taka chaw ei theihna te, tui taka mutthilh theihna te hi hausaknaah awm lovin Pathianah a awm zawk a ni. Amah țih tlat tute chhungril hlimna hi khawvel mite pawhin an zawn a ni a, mahse an hmuh theih si loh a ni. “A ram leh a felna zawng hmasa ula, chung zawng zawng chu a pek belhchhah ang che u” titu hian Amah țihtute chu tlachamin a siam ngai lo va, midiklote chu an lak khawm leh chhek khawm sa pawh an kutah a cham rei tir ngai lo thung.

*_Tichuan, fin emaw, ât emaw, tlawktlaw emaw eng nge lem chuang. Mi fing chuan a kalna a hria a, mi â chuan a hre lo va, mahse khawrel thuhmun an zaa chungah a thleng tho tih ka hmu. Mi â chunga thleng ang bawk chu ka chungah pawh a thleng dawn, mi fing pawh, mi â pawh, kumkhuaa hriatrengna a awm dawn lo; ni lo la thleng tûrahte chuan an vaia theihnghilh daih an ni ang. Mi â ang bawka mi fing pawh a thih tûr zia mai chu!_*

Thlanmual te hi han en ila, mi fing leh fing lo, hausa leh rethei an lut za vek a, an thlan pawh a thuk zawng inang, a zau zawng intiatin a awm za mai a ni. Hausa ber thlan pawhin kum sawmnga chhung tuaihnum a hlawh lem lo. Kan tu leh fate pawhin min hre reng hek lo.

Aw le, dam chhung tawiteah hian Pathian chuan hlim tak leh thlamuang taka awma, kan lei taksa a tawp hunah a chatuan lawmnaah chuan lut țheuh turin min duh vek a, a kawng pawh min kawhhmuh a, chu chu ngaihven berah i neih ang u, kan thinlung hi khawvel thiltea khatliam lovin. Lalpa țihtu chuan engkim a nei a, Amah hrelotu chuan engkim a chân sa vek a ni.

*Thuhriltu 11:9-10*

*Thalaite u, in that lai chen ula, in la naupang viau lai hian hlim rawh u, Amaherawhchu Pathianin in chungah Ro a rêl dawn tih rhe reng ang che u.*

*Engmah engto nei suh ula, In pang tinatu awm hek suh se, In that lai hun a rei dawn lo.*

Engkim bul leh tawp chu Pathian a ni a, engkim chungah hun tawp rorelna a la lek dawn a, tumahin kan pumpelh lo vang. Chuvangin Pathian hlata awm chu thlamuangin a nung lo va, Amah pan mai hi hlimna leh hahdamna a ni.

*Sam 90:12 Kan dam chhûng nite chhiar dan tûr min zirtir ang che, Finna thinlung kan neih phah hialna tûrin.*

*Lalpan malsawm rawh se, Amen.*

*@Tpa Ngente…*

KOHHRAN INTHUNUNNA HI

Laltanpuia Tpa Ngente.

Kohhran hian Bible in tlu a tih zawng zawng te hi a thununin a phuar vek lem lo va, a chhan lian tak pakhat chu, mimal thlarau lam nun te a nih hlawm avangin inhmuhpuia inhriatpui vek theih a ni loh vang a ni pakhat a. Tin, tumah mifel famkim a awm theih loh avangin Kohhran hi mifel famkim te chauh awmna tur a ni lo bawk a, tluk leh din fawma nung ve țawk țawk te leh Buhlem te pawh kohhranah chuan an leng vek mai. Nikin Ni rorel hunah Pathianin a la thliar mai dawn a ni.

Amaherawh chu Kohhran chuan sual a phalrai ta tihna a ni lo va, Bible zirtirna ațangin a tih theih chinah Pathian thu dik humhimin thununna a lek țhin a ni.

Krista taksa Kohhran hian Biblea kan hmuh *Tlukna* zawng zawngte hi a thunun vek rem lo mahse *Dan* a neih chu a ngai tho va. *Dan* a awm loh chuan ringtute pawh ni mah ila rei tak a inphuar khawm theih dawn loh va, hetianga *Dan* a neih avang hian vawiin thlengin kohhran hi nghet takin a la ding thei a ni. Kohhran hrang hrangin *Dan* kan neih țheuhte hi Thlarau thianghlim hmanrua an ni vek a, Pathianin kohhran puipate kal tlanga min pek te an ni tih hi kan hriain kan pawm hmiah mai tur a ni.

Tichuan, *Dan* a neih a ngaihna chhan hrang hrang te han sawi ila:

*1. Pathian ropuina lan tir nan.*

*2. Pathian thu dik humhim nan.*

*3. Ringtute inpumkhatna turin.*

*4. Ringtute nun venhim nan.*

*5. Kristianna humhim nan.*

*6. Kohhran thianghlimna vawn nun nan.*

*7. Tlu tawhte siam țhat leh nan.*

Tichuan, Kohhran chuan Bible zirtirna milin a hnuaia tar lan te anga kohhran dan bawhchhiaa thil tisualte chungah thununna a lek țhin a. Mahse, kohhranin dan a neihte hmanga mi a thunun hian Biblea kan hmuh, *”Lei chunga i phuar apiang vanah phuar a ni ang”* tih thu tihdikna tur anga thunun a ni lo va, Krista din kohhran vawn thianghlim nan te, Pathian thu humhim nan te, hmangaihna leh anmahni siam that duhna thinlung te nen thunun an ni zawk țhin a ni.

Chung a thunun țhin te chu:

*1. Kristian rinna kalh zawnga awm te chungah.*

*2. Tual that chungah.*

*3. Inngaihna suala tlute chungah.*

*4. Uire te chungah.*

*5. Aien leh dawithiam te chungah.*

*6. Kohhran dan hrang hrang bawhchhiate chungah.*

Heti chin hi duhtawk rih mai ang.

*Lalpa’n a thu malsawm rawh se. Amen.*

*♦🔹Tpa Ngente🔹♦*

UIRENA SUAL HI

Laltanpuia Tpa Ngente.

Van ram kan thlen hunah chuan kan lawmman dawn a inthlau zung dawn tih bible atangin kan rin hriat thei a, mahse mahni chan tawkah tumah kan vui chuang lo vang. Chutiang bawkin Meidil lamah pawh a sa lai district a awm ngeiin a rinawm. (Marka 12:40 hmeithai sum an ei a, tlang bum nan rei tak an tawngtai thin; chungho chuan thiam loh an chang nasa lehzual ang,” a ti a.)

Cheng khat eiru te, nuai sawm eiru te, uire te, tual that te hi an pianthar loh chuan an vaiin hremna hmun khatah an lut vek ang a, tisual te deuh chan kha hremna rau rauah tawrh a ziaawm chuang hauh lo ang a, hrehawm nasa lehzual tuar tur pawh an awm ngei ang.

Chutichuan, sual tam tak zingah uirena hi eng vanga langsar bik nge a nih. Tin, bible pawh hian eng vanga haw bik em em anga lang nge a nih le.?

Sual chi hrang hrang zingah Uirena hnuhma hian mihring a hliam na ber a, chuvangin Pathian pawhin a haw bik niin a lang. Uirena sual khawihtute chuan thih hnua thlarau hremna chang ni lovin, an dam chhung ngei pawhin hremna an pumpelh lo hle mai tih hi Pathian thu ngaihtuah chian chuan phat rual a ni lo.

Lal Davida’n fimkhur lo taka Pathian dan bawhchhiaa Uria nupui a uire hnu khan a chhandam hlimna kha a hloh ta daih a, Pathian hnenah tap zawih zawihin dil leh mahse a dam chhungin a hmu let leh tawh lo. Chu mai a la ni lo, a dam chhungin a in chu thisen chhuahnain a kian san tawh ngai reng reng lo a nih kha.

Tin, uire nu pawh khan Isua ngaihdamna chu a chang ngei mai, mahse, a dam chhungin uire nu nihna a phur reng tawh a, chu chuan a kian san tawh lo.

Chuvangin eng vang pawhin thinurin, rilru nain, tlawmngaiin, tih zaha awmin, hmusit leh hnuaichhiahin awm mah ila, Lal Davida leh uire nu kha hre rengin, kan inchhirna tur eng mah insiam suh ang u.

Pathian chhandamna hi chhandamna famkim, taksa, rilru, thlarau chhandamna a ni a. Vanah chauh ni lovin, he leiah ngei pawh hian taksa hrisel leh rilru hlim taka a chhandamna famkim chu min chen tir a duh a. Hei hi mi tam tak chuan bawh boin lungngaihna tam takin kan inchhun tlang chuk thin a ni. Chuvangin mi â te anga bawh bo mai lovin Lalpa chu thahnem ngai takin i vuan tlat ang u.

@Tpa Ngente…

CHHANDAMNA NGHET

CHHANDAMNA NGHET

Tpa Ngente.

Chhandamna nghet han tih hian kan rilruah “Chhandamna a bo thei tawhlo” tihna tlukah kan ngai mai țhin a, hei hi a ni ngawt lo deuh. Tin, ringtute zingah chhandamna a bo thei tawhlo tih thlamuanpuia bo thei lo nun kawl hauh si lo hi amaka maka tam an awm reng țhin niin a lang bawk.

Mi țhenkhat chuan, “Chhandamna a bo leh thei, thei lo tih chungchang hi inhnialna atthlak leh thil țullo mai a ni, miin Kristaah nun a neih phawt chuan a duh leh bo thei tiin pawm se, a duh leh bo thei lo tiin pawm se a pawina awm lo, hei hian kan van kai leh kai lohna pawh a hril chuang lo,” an ti țhin a.

Amaherawhchu, Bo thei lo nun kawl hauh si lo va miten Bo thei lo *’Nun nghet’* an chuankai tawh an sawi hriaa chang ve ta emaw intia ngaih lo ti țha ve ngawt te, lo thlamuang ve ringawt te a awm theih a. Tin, bo thei lo tih changchawia nun lo thlahdah ta mai te, sual pawmzam ta mai te pawh a awm theih bawk a. Chung avang chuan helai thu hi ngun taka ngaihtuah a ngai a, van kai leh kai loh a kawk lo tih ngawt chi a ni lo va, a kawkin a hril hle zawk tih hi hriat a pawimawh khawp mai. Chuvangin kan Bible hian helai thu hi engtiangin nge min kawhhmuh tih hi hriat fiah i han tum dawn teh ang.

Aw le, Bo thei lo nun, Nun nghet, Bo leh mai mai phal tawh lo leh Bo ngam tawh lo Nun hi awm zawng a awm teh meuh mai, Lal Isua leh Tirhkohte zawng zawng pawhin chu nun chu nei vek turin min duh a, an zirtirna leh an lehkhathawn te pawh chumi nun kan neih theihna tura zirtirna leh kawhhmuhna chuan a khat deuh thaw a. Heng Lal Isua leh Tirhkohte zirtirnate hi ngun taka kan zir chuan, mi țhenkhatten an sawi țhin anga vawikhat piantharna chan tawh chuan, emaw, vawikhat pianna dika pian tawh phawt chuan bo thei tawh reng reng lo tih nen chuan a inang lo hle tih kan hre thei ang.

Ringtute hi kan hnuk a chah hma loh chuan *’Tiam chin’* lam pana kal kan ni a, tisaa awm kan la nih chung hi chuan chu *’Tiam chin ram’* chu kan la thleng rih lo va, chu tiam chin ram chu luah tura buatsaih lai mek kan ni. Paula chuan 1 Korinth 9:26-27 ah chuan, *‘’Tiam chin lam panin ka tlan ngat ngat a, boruak mai hnek lovin mahni ka inhnek zawk țhin a, chuvang chuan ka taksa ka tichhel a, ka thuhnuaiah ka dah tawh a ni, chutilochuan mi dangte hnena ka tlangaupui hnu pawhin eng emaw tiin keimah ngei hi paih thlakin ka awm dah ang e.’’* a ti a, tiam chin ram a thlen hma loh chuan paih thlakin a la awm thei reng tih a tar lang a ni. Amah ang bawk hian keini ringtu, țawihthei taksaa la awm zawng zawngte pawh hi paih thlakin kan la awm leh thei tih i hria ang u. Hei hi Pathian rorel dan a ni. Amaherawhchu, Tiam chin ram kan thlen hunah chuan rorelna a danglam tawh anga, sual a awm tawh lo vang a, thlemna a awm tawh lo vang a, thlaraua famkimna hmun thleng tawh kan nih dawn avangin paih thlak leh theihna rorelna a awm tawh lo vang.

Amaherawhchu, Pathian hian Amah ringtute hi he leiah hian mihring mihrinnaa a khina kan khin phak rual loh Setana hmachhawn tur hian mal takin min hnutchhiah ngawt lo va, kawng engkima min pui tur leh kawng min kawhhmuha min kaihruaia min chelh tlat turin *’A Thlarau thianghlim’* min pe a. Tin, kan inralthuamna atana kan hman turin țawngțai dan min zirtir a, a thu chuanna Bible min pe bawk a. Chumi ena kala, inralthuamna atana hmang apiangte chu puitlinna kawngah a hruaiin hriatfiahna a neih tir a. Chumi awmzia chu, anmahniah Krista chu siam puitlinin a awm deuh deuh zel a, Thlarau lamah an țhang lian telh telh a, Pathian khawngaihna leh van nun hlutna an hmuh fiah deuh deuh a, chutih rualin lei lam thilte hlut loh zia an hmu chiang telh telh a, chutianga siam puitlina awmte chuan Pathian khawngaihna hi an vah bo san phal tawh lo va, an vah bo san ngam tawh hek lo țhin a ni. Chutiang chuan Pathian chuan tihluihna tel lovin, thlaraua Amah hriat chianna leh hriatfiahna hmangin min hung țhin a, engti kawng maha vak bo ngam tawh lo nun min siam sak țhin.

Hei hi han sawi kai lawk teh ang. Kan Bible a lehkhathawn ho reng reng hi ringlote hnena thawn a ni lo va, Tirhkohten an taksa ngeia rawng an va bawlna hmuna thlaraua an fa hrinte, kohhran an phun te, Thlaraua piang tawhte ngei hnena an thawn a ni vek a. Chung ringtu, thlaraua an fa hrin ngei te zinga mi tam tak chuan khawngaihna tluk sanin an rinna chu an bansan leh a, Krista nen an inthen leh ta tih kan hmu a ni, hetiangin:

*_Galatians 1:6 ah chuan, “Krista khawngaihna zara a kotu che u kha chuti thuta Chanchin Tha hrang lama in pakaisan hi mak ka ti a ni.”_*

*_Galatia 3:1-3 “Aw Galatia rama mi a te u, tuin nge dawi che u? in mithmuh ngeiah Isua Krista chu khenbehin chiang taka lantir a nih tehlul nen, hei chauh hi in hnen ata lo hriat ka duh, Dan thiltihte avangin nge Thlarau chu in hmuh in ngaihthlaka in rin avangin?.. Heti emin in a maw? Thlarauva tan tawh zet siin tisain in zo dawn em ni.”_*

*_Galatia 4:8-9 “Nimahsela, khang Pathian inhriat loh lai khan, an pianzia reng pawha Pathian ni hlei lote bawih in ni a. Tuna Pathian in lo hriat hnu hi zawngin–ni lo, Pathian mi hriat in lo nih hnu hian tih tur a ni zawk e, – khawvel zirtirna dik lo engmah ni hlei lo, a bawiha awm leh in chakate lamah chuan engtiziaa hawi kir lehnge in nih,”_*

*_Galatia 5:4 “Nangni Dana thiam chan tumte u, Krista nen in inthen ta: khawngaihna chu in tluksan ta.”_*

Hei aia chiang hi enge kan la beisei le.? Pathian mi hriat lo ni tawh mi tam takte chuan Krista nen ințhenin khawngaihna an lo tluksan leh ta a nih hi. Heng mite hian Van an la chang cheu ang maw…? Hnai lo ve, A khawngaihnaa awm rengte chauhin Van khi an chang ang.

Tin, Hebrai 10:36-39 te pawh hi en leh ila. *_”Pathian duhzawng in tih hnuin thiltiam chu in hmuh theih nan chhelna in ngai asin. Rei lo te achinah Lo kal tura chu a lo kal dawn si a, Rei a rial tawh lo vang. Nimahsela ka mi fel chu Rinnain a nung ang: A hnungtawlh erawh chuan, Ka rilruin amahah chuan lawmna reng a nei lo vang._*

Hengte hi ngun taka kan ngaihtuah chuan, ringtu tam takte chuan khawngaihna tluk sanin Krista nen an ințhen leh ta tih kan hre thei ang. A ruh langin han sawi ta ila, an chhandamna chan tawh chu an HLOH leh ta a ni.

Aw le, Hei hi engvang nge kan tih chuan, Nun nghet nei tura Thlaraua puitlinna an la neih loh vang a ni. Anmahniah Krista chu siam puitlinin a la awm lo va, *’Nun nghet, engti kawng maha bo ngam tawh lo nun’* nei turin thlaraua puitlin an la mamawh hle a ni.

Chuvangin Hebrai ziaktu chuan bo ngam tawh lo leh bo phal tawh lo nun, *’Nun nghet’* an neih theih nan, fuih titih, vau titih, thlem titihin heti hian tih chak a han tum a, *“Nimahsela, keini zawng boral tura hnungtawlh pawla mi kan ni lo va; nunna humhim tura rinna nei pawla mi kan ni zawk.”* tiin. A nihna takah chuan an thlarau dinhmunin a la thleng phak chiah lo chungin *’fak phura tih chak’* a tum a ni ber.

Tichuan, heta țanga lang chiang em em chu, *’_Keini zawng boral tura hnungtawlh pawl ami kan ni lo va’_* a tih hian, boral tura hnungtawlh pawl an awm tih a lang chiang a, *’_Nunna humhim tura rinna nei pawl ami kan ni zawk’_* a tih avang pawh hian, nunna humhim zo ta lo an awm tih a chiang hle bawk.

Paula chuan hei hi a vei em em a, puitlin an mamawh a, puitlin lam pana ke an pen loh chuan sualin a lem zo leh mai dawn tih a hmu chiang a, chuvangin, Galatia 4:19-20 ah chuan, *”Ka naute u, Krista chu nangmahniah siam puitlina a awm hma loh chuan nau veiin ka vei leh che u hi. A ni, tun lai hian in hnena awma ka aw tihdanglam ka chak theihzia mai chu; in chungthu-ah ka mangang si a.”* a ti hial a nih hi.

*Pathian chuan ringtute hi thlarauva țhang liana, puitlinga, chuta țanga Van nun hlut zia thlaraua hriat fiahna neia, bo phal tawh lo leh bo ngam tawh lo nun min neih tir hi a thil tum a ni a. Chutiang chuan Thlaraua a khawngaihna leh hmangaihna hlut zia hriatchianna hmangin min hung zawk țhin a ni. Chuvangin felna thua hriatna nei lo nausente chuan Van nun hlut zia an hriat fiah zawh tawk loh avangin he nun nghet, bo phal tawh lo leh bo ngam tawh lo nun hi an thleng phak țhin lo va, chuvangin Tirhkohte hun chhung ngei pawhin mi tam tak an bo leh ta a nih kha. He nun nghet hi Thlaraua siam lena awm tawh, puitlinna nei tawhte chanvo a ni tih hi chiang taka kan hriat a ngai a, chumi nun nei tur chuan țhahnem i ngai ang u khai.*

Rangkachak leh lunghlu te pawh hi a hlutna hre lo tan chuan engtihna mah a ni lo, pe mah ila a tuai vut vut ang a, a khalh nin hunah an paih daih mai ang. Nimahsela, a hlut zia hre chiangtu chuan a roh tlat ang a, a țul a nih phawt chuan a nunna hial pawh a thap ngam ang. Chutiangin, Van nun hlut zia hre fiah lo tan chuan Pathian khawngaihna te, Pathian hmangaihna te, Pathian chhandamna te hi a hlu zo tawk țhin lo va, an tan khawvel hi a hlu zawk vet vet țhin em em a ni. Chuvangin puitlin lam pana ke pen peihlote chu an bo nge nge țhin. *’Van nun hlut zia thlarau mita hmu fiahtu tan erawh chuan khawvel thiltea han thleng leh phal chi rual a ni lo. Chu chu ‘Nun nghet’ bo leh thei tawh lo, Chhandamna nghet chu a ni.’*

*Lalpan kan zaa tan malsawm rawh se, Amen.*

*♦🔹Tpa Ngente🔹♦*

(Hei hi ka post hmasa *’Bawhchhiatna’* tih leh *’Kan tih tel lo chhandamna’* tih chhunzawmna atana ka han ziah a ni e.)

BAWHCHHIATNA

BAWHCHHIATNA

Laltanpuia Tpa Ngente.

Bawhchhiatna chungchang hi heti hian han sawi fiah dawn ila. Mahse, Pathian chuan bawhchhiahnaah khan mipa (Adama) chungah chauh mawhphurna a nghat a, hmeichhia (Evi) chungah mawhphurhna a nghat ve lo tih kan hre hmasa dawn nia.

Pathian chuan a mihring siam Adama, sual reng reng la hmelhriat lo, thlemna leh bumna pawh la tawng lo, thinlung thianghlim tak ai chuan Setana chu nasa takin a fing zawk tih leh, setana chuan mipa thinlung kawltu hmeichhia chu hmanruaah hman nachang a hre em em dawn tih pawh a hre sa vek a. Mahse, Adama ah chuan duhthlan theihna zalen (free will) a dah avangin chung chu dan a tum lo va, chu mai ni lovin Setana chuan Adama chu suala a hnuh luh theih nan tihluihna tel lo chinah chuan eng hmanrua pawh hman a phalsak a ni. A chhan chu, Pathianin a chatuan lawmna fa a zawnna kawngah hian tihluihna tel lo va mahni duh thu ngeia a thu awihtu chauh hi a zawn leh a duh a nih tlat vang a ni. Hei vang hian a mihring siam chu duh thlan theihna zalen (free will) a pe a, duh thlan tur pawh a pe nghal bawk reng a ni, hetiangin:

*_(Genesis 2:16-17 Tin, LALPA Pathian chuan mihring hnênah chuan, “Huana thing tinrêng rahte hi i duh duhin i ei thei e; a chhia leh a tha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tiin.)_*

Hengte hi ngun takin ngaihtuah ila. Engvangin nge ei loh tur thupek a pek.? Sawi tawh ang khian an duhthlanna hmanga a thu awiha awih lo thei tura a siam tawh vang a ni. Duh thlang thei lo hmaa duh thlan tur chhawp chhuah sak chu mi â hna a ni ang. Tin, Pathianin eng ang mi nge a zawn.? Tihluihnaa a thu awih tura a phuar beh tur nge a zawn tihluihna tel lo va mahni duh thu ngeia a thu awihtu.? Khita kan sawi tawh ang bawk khian tihluihnaa a thu chauh awih tura a phuar behte chungah chuan a lawm a kim thei dawn lo va, chuvangin zalenna a pek hmanga mahni duh thu ngeia a thu awihtu hi a zawng a ni.

Tichuan, hei hi han chhiar chhunzawm ila. *_Genesis 3:1-6 “Tin, LALPA Pathianin ram sa a siam zawng zawngah chuan rûl a fing ver vêk ber a. Tichuan ani chuan hmeichhe hnênah chuan, “Pathianin, ‘Huana thing rah rêng rêng hi in ei tûr a ni lo,’ a ti elo maw?” a ti a. Tin, hmeichhia chuan rûl hnênah chuan, “Ti lo ve, huana thing rahte hi kan ei thei asin: huan lai taka thing awm rah erawh chu Pathianin, ‘In ei tûr a ni lo, tawh pawh in tawk tûr a ni lo, chutilochuan in thi ang,’ a ti a ni” a ti a. Tin, rûl chuan hmeichhe hnênah chuan, “Thi teh suh e: in ei nî apang chuan in mit a lo vâr ang a, a chhia leh țha hriain Pathian ang in lo ni dâwn tih Pathianin a hre reng a nih chu,” a ti a. Tichuan hmeichhia chuan thing rah chu ei mi a ni tih leh, mit la tak a ni tih leh, mi tifing tûrin thing rah îtawm tak a ni tih a hriat chuan thing rah țhenkhat chu a lo va, a ei ta a; tin, a pasal a pe ve a, a ni pawhin a ei ve ta a.”_*

Helaia ka rilru a lo lang chu, engvangin nge Setana khan a chhia leh a țha hriatna thing ni lovin nunna thing rah zawk kha ei tir tuma a beih zawk loh.? tih hi a ni. Nunna thing pawh kha a awm ve reng si a, kha zawk kha ei turin han thlem thluin han ei hlauh zawk sela chuan thil a danglam nasat duai duai dan tur hi suangtuah thiam phak pawh a ni lo. Hei hian Pathian chungnun zia, a chatuan remruat fel zia leh Setana pawh a phal chin baka a chet theih loh zia a lan tir chiang em em a ni. Setanan Pathian laka zalenna a hmuhah hian thlarau thihna thlen theihna a nei a, nunna thlen theihna erawh chu a nei tel lo va, hei vang hian nunna thing ei tir tura thlem turin zalenna a nei tel ve lo tih a lang a ni. Nunna thing chu mihringin a chhia leh a țha a hriat hnuah ei nachang hriain mahni thuin a ei thei dawn a, mahse Pathianin sual thupha chawina inthawina thisen tel lo va chatuan nunna neih a phal loh avangin a ven tir ta tlat a nih kha.

Tichuan, fing ver vek tak Rul chuan a finna hmangin hmeichhia chu a va vehthlem a. Pathian thupek awm sa chu dawtah chan tirin ‘Thi teh suh e’ a va ti a. Pathianin thihna a sawi chu Thlarau thihna a ni tih a hre reng a, mahse chu chu thupin taksa thihna thu a va sawi pui ta daih a. Tin, mit varna te, a chhia leh a tha hriatna te, Pathian ang nihna te a va sawihmuh bawk a. Hetah hian, sual reng reng la hre lo, thlemna leh bumna pawh la tawng lo hmeichhia chu bum a awl tur zia chu hriat sa a ni.

Tun laiin TV ah te advertisement chi hrang hrang mawi tak tak, thinlung leh mit la tak tak kan hmu țhin a. Thiam taka faknain mihring thinlung a hneh theih zia pawh kan hre vek awm e. Sumdawng company hlawhtlingte pawhin fakna thil tih theih zia an hre chiang a, sum tam tak sen pawh an phal țhin reng a ni a.

Sual reng reng la hmel hriat lo, bumna leh thlemna pawh la tawng lo, fakmawina pawh la tawng chuang lo hmeichhia chuan dawt thu hmanga fakmawina thu thlum tak a han hriat chuan thing rah chu a hmu itawm ta em em mai mai a, a insum zo ta lo va, tichuan a lo va a ei ta mai a. A pasal pawh chu a pe ve a, ani pawh chu sual reng reng la hmel hriat lo, bumna leh thlemna te pawh la tawng bik lo, fakmawina pawh la tawng chuang lo a nih avangin Pathian thupek ngaihtuah tawh miah lovin a thinlung kawltu a nupui thu chu ihe lova zawmin a ei ve ta mai a ni.

Hetah hian Setana fin zia a lang. Mipa (Adama) hneh tur chuan tihluihna hman phal sak a ni si lo va, mahse, mipa chaklohna ber chu hmeichhia a ni tih a hre chiang thung a. Pathianin mihringa a chhiar zawk leh thu pawh a pek zawk mipa kha va bitum ngawt sela chuan a hlawhtling kher lovang. Mahse, *”Chuvangin mipain a nu leh pa kalsanin a nupui a vuan ang”* tih ang khan, mipa thinlung chu hmeichhiaah a awm a, mipa thinlung kawltu chu hmeichhia a ni tih a hre chiang a. Hei hi Pathianin mihring a siam dan phung a ni tih pawh a hre chiang em em a, chuvangin mipa chaklohna ber hmeichhia, bum awl zawk lehnghal chu thiam takin hmanruaah a va hmang ta a, tichuan Mipa (mihring) chu ama duh thu ngeiin bawhchhiatnaah a luh tir thei ta a ni.

Tichuan mihring hmasa berte chuan an chhungah chatuan minung kawl sa reng chungin thing rah chu an ei a, an chhunga chatuan minung chu a lo thi ta hlauh zawk a. Pathian ang ni tawh sa reng chungin an ei a, Pathian an anna zawng chu a bo ta hlauh zawk a. Adama bawhchhiat anga bawhchhe ve lo an thlahte zawng zawng pawh thihna chuan min man ta vek a, vawiin thlengin sual zungzam chu kan miziaah a bet ta tlat a nih hi.

Lal Davida’n, *”Ngai teh, khawlohnaa dinin ka awm a; Ka nun sualin mi pai a,”* (Sam 51:5) a tih ang hian, mihring piang chhuak zawng zawng hi setana laka uire tawh thisen bawlhhlawh thlah vek kan ni a, Pathian mithmuhah mi bawlhhlawh, a hnena cheng tlak lo veka piang chhuak kan ni.

Bawhchhiatna bul țanna chu a chian lehzual nan heng Bible changte hi han en chhunzawm leh ila.

*_(Genesis 3:17 Tin, Adama hnenah chuan, “I nupui thu i zawm a, thing pakhat, ‘A rah i ei tur a ni lo’ tia thu ka pek che kha, a rah i ei avangin lei hi nangmah avangin anchhe dawngin a awm ta a ni.)_*

*_(Rom 5:12 “Chutichuan mi pakhat avangin sual khawvelah a lut a, sual avangin thihna a lut bawk a”)_*

*_(Rom 5:18 Chutichuan sual pakhat avangin thiam loh chantirna rorelna chu mi zawng zawng chungah a lo awm a; chutiang bawkin thil fel pakhat tih avangin nunna hmuh nan thiam chantirna thilthlawnpek chu mi zawng zawng chungah a lo awm.)_*

*_(1 Timothea 2:14 Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a.)_*

Heng chang tar lan pali te hi ngun taka kan ngaihtuah chuan, Pathianin, lei anchhe dawnga a awmna chhan a sawi chu Adama a ni tih kan hmu a. Tin, Adama chu bumin a awm lo tih kan hmu bawk a. Buma awm lo Adama chu bawhchhetu a ni tih a tar lang bawk a ni.

*Lalpan a thu malsawm rawh se, Amen.*

*@Țpa Ngente….*

(Hei hi ‘Pathian chatuan thil tum’ tih ka ziak chhunzawmna anga ka ziah a ni a, ‘Kan tih tel lo chhandamna’ tih hmangin chhunzawm leh a ni ang.)